Kaos në SHBA/ Nxirren armët në Kongres, raportohet për të plagosur. Një grua në gjendje kritike

Vijon situata e tensionuar në SHBA.

Një numër protestuesish që mbështesin presidentin aktual Donald Trump janë futur brenda në Kongres, ku ligjvënësit  janë mbledhur në seancë për certifikimin e votës elektorale të zgjedhjeve të 3 nëntorit të vitit të kaluar.

Nënpresidenti Mike Pence është shoqëruar për në një vend të sigurt brenda Kapitolit, ndërsa më pas është evakuuar që aty.

Gjendja në Kapitol dhe rreth tij është rënduar, pasi protestuesit janë përplasur me policinë që ruajnë ndërtesën.

“Ne duam Trump” dëgjohen thirrjet e protestuesve.

Autoritetet që merren me ruajtjen e sigurisë kanë dhënë një alarm emergjent.

Madje, në një foto të publikuar në CNN, shihen teksa persona të armatosur ruajnë derën ku po mbahej seanca.

Forcat e sigurisë të Armatosur janë të pozicionuar në derën kryesore, me qëllim për të parandaluar hyrjen e protestuesve.

Një grua raportohet të jetë plagosur me armë zjarri ndërsa situata në Kapitol mbetet kaotike.

Nuk dihet nëse bëhet fjalë për një protestuese, por burimet sqarojnë se gjendja e saj është kritike pasi u qëllua në gjoks.

Burimet për CNN nuk mund të japin detaje të mëtejshme mbi rrethanat e të shtënave.