LIGJET E BIZNESIT
Forcat e policisë kanë arritur të zbardhin grabitjen e djeshme që ndodhi në banesën e kambistit Shefqet Muça në qytetin e Korçës.
Në njoftimin zyrtar thuhet se autorët kanë arritur të marrin 40 milionë lekë (të vjetra) pasi Muca është përleshur me ta dhe për pasojë 57-vjeçari ka mbetur i plagosur.
Uniformat blu ndërkohë bëjnë me dije se një prej autorëve tashmë ka rënë në pranga.
Ai është identifikuar si Agim Çaçi, 42vjeç.
Policia ka shpallur në kërkim autorin tjetër me iniciale M. A., 33 vjeç, si dhe po punojnë për identifikimin dhe kapjen e dy autorëve të tjerë.
NJOFTIMI ZYRTAR I POLICISE
Zbardhet ngjarja e ndodhur një ditë më parë në lagjen nr. 1, Korçë, ku 3 shtetas i vodhën me dhunë një kambisti, 4.000.000 lekë.
Arrestohet në flagrancë njëri prej autorëve të dyshuar të kësaj ngjarjeje, identifikohet dhe shpallet në kërkim njëri nga bashkëpunëtorët.
Specialistët për Hetimin e Krimeve në Komisariatin e Policisë Korçë, nën drejtimin e Prokurorisë pranë Gjykatës së Shkallës së Parë Korçë, në vijim të punës intensive hetimore për zbardhjen dhe dokumentimin e ngjarjes së ndodhur më datë 11.01.2021, në lagjen nr. 1 të qytetit të Korçës, ku tre shtetas i vodhën me dhunë një sasi prej 4.000.000 lekësh, shtetasit Sh. M., 57 vjeç, para banesës së tij, bënë arrestimin në flagrancë të shtetasit A. Ç., 42 vjeç, banues në Durrës, si edhe shpallën në kërkim shtetasin M. A., 33 vjeç, banues në Korçë.
Nga ana e Policisë po vijon puna për identifikimin dhe kapjen e bashkëpunëtorit të tretë të dyshuar si i implikuar në këtë ngjarje, për ndalimin e 33-vjeçarit M. A., vënien përpara përgjegjësisë ligjore të tyre, si edhe për dokumentimin e plotë të kësaj ngjarjeje.
Materialet në ngarkim të tyre i kaluan Prokurorisë pranë Gjykatës së Rrethit Gjyqësor Korçë, për veprat penale “Vjedhja me dhunë” e kryer në bashkëpunim dhe “Plagosja e rëndë me dashje”.
