“Hëngrëm bukë te Nusreti me mediat”/ Gazetarja përgënjeshtron justifikimin e Ahmetajt

I gjendur ngushtë ndaj akuzave të opozitës dhe medias, ministri i Rindërtimit Arben Ahmetaj ka sqaruar se në restorantin luksoz në Dubai kanë ngrënë thjesht bukën e servirur nga miku.

Si për të përforcuar këtë fakt dhe se fatura nuk u pagua nga taksat e shqiptarëve, Ahmetaj tha se pjesë e ftesës kanë qenë dhe mediat e pranishme. Përkatësisht tre media me nga dy veta staf secila, gazetarë dhe kameramanë.

Në lidhje me këtë lajm ka reaguar një prej gazetareve të pranishme në vizitën në Dubai. Ola Xama, gazetarja e ekonomisë në Tv Klan, ka përgënjeshtruar faktin se ka qenë e pozicionuar në lokalin e Nusretit në një tavolinë me kolegët e saj, ku paralelisht sipas Ahmetaj ishte dhe një tavolinë e tretë me zv-ministrat.

Në rrjete sociale Xama shkruan se nuk ka qenë as e ftuar dhe as ka vizituar restorantin luksoz.