Bashkëpunim me amerikanët kundër pastrimit të parave, Denaj: Shqipëria, angazhim maksimal

Në kuadër të takimit të parë për asistencën teknike që Departamenti Amerikan i Shtetit do të ofrojë Shqipërisë, si angazhim i luftës kundër parandalimit të pastrimit të parave dhe financimit të terrorizmit, Ministrja e Financave dhe Ekonomisë Anila Denaj theksoi angazhimin e qeverisë shqiptare për zbatimin e plotë të rekomandimeve ndërkombëtare.

“Kemi marrë tashmë vlerësime pozitive për disa nga objektivat e përbashkët me institucionet ndërkombëtare, duke miratuar dy ligje të rëndësishme, si ai për Regjistrin e Pronarëve Përfitues  dhe për Regjistrin e Llogarive Bankare”, tha Denaj.

Sipas Denajt, puna për të ngritur sistemet e nevojshme për të siguruar transparencë, llogaridhënie dhe zbatim të ligjit po vijon, dhe plani i veprimit është miratuar në Komitetin e Bashkërendimit të Luftës kundër Pastrimit të Parave, të kryesuar nga Kryeministri Rama.

Programi  amerikan do të zgjasë dy vjet dhe do të përqendrohet kryesisht në forcimin e përputhshmërisë me rekomandimet e Moneyval në fushën e luftës të financimit të terrorizmit.

Në takim ishin të pranishëm edhe Guvernatori Bankës së Shqipërisë, Gent Sejko, si dhe përfaqësues të Autoritetit të Mbikëqyrjes Financiare./ A2CNN