Tension dhe përplasje/ Policia përdor gaz lotsjellës ndaj protestuesve, 8 efektivë të plagosur

Tensione dhe përplasje në protestën e mbajtur para Kryeministrisë.

Policia dhe Forcat Speciale kanë vendosur të shpërndajnë protestuesit me gaz lotsjellës, teksa qindra të rinj kanë tentuar të hapin dyert e Kryeministrisë.

Mësohet se ata kanë qëlluar me sende të forta efektivët e policisë, si dhe kanë thyer dyert e godinës, në tentativë për të hyrë brenda, por janë zmbrapsur nga Forcat Speciale, që kanë mbërritur para Kryeministrisë, duke e rrethuar godinën.

Sipas informacioneve deri më tani nga protesta raportohet se janë plagosur 9 efektivë policie, të cilët kanë përfunduar në spital.

Burime nga policia bëjnë me dije se 5 efektivë janë plagosur para kryeministrisë kurse 4 para Ministrisë së Brendshme. Ata kanë marrë goditje në kokë, këmbë e trup.