“Opozita duhet të përgatitet” Paralajmëron Berisha: Ja ç’do ndodhë nëse dhunohet vota më 25 prill

Ish-kryeministri Sali Berisha ka bërë mbrëmjen e sotme një paralajmërim të fortë, duke thënë se opozita duhet të përgatitet për një 20 shkurt të dytë, duke iu referuar rrëzimit të bustit të diktatorit Enver Hoxha.

Berisha shtoi se opozita është përgatitur për zgjedhje të qeta më 25 prill, por në rast se vota cënohet, do të përmbytet kulti i më të ligut që ka patur Shqipëria pas Enver Hoxhës.

“Opozita duhet të përgatitet për ditën më paqësore me votën e saj më 25 prill, por njëkohësisht duhet të jetë gati për një 20 shkurt të dytë. Në 20 shkurt shqiptarët përmbysën në pamje të parë një bronz, por në të vërtetë një kult më të keqin që kishin patur në histori. Nëse iu dhunohet vota, opozita do të përmbysë më 25 prill kultin e më të ligut që kanë pasur pas Enver Hoxhës, që grabit zgjedhësit, për një kryebandit që nuk njeh normë, nuk njeh ligje, moral dhe nuk respekton asgjë”, ka thënë Berisha në “Tempora”.