“Nuk kërkoj mëshirë” Babai i Klodian Rashës tregon bisedën me Ramën: Ti vendos 700 pensione, unë nuk kam nevojë për para

Babai i të riut Klodian Rasha që u vra nga një efektiv policie më 8 dhjetor, ka treguar detaje nga takimi me kryeministrin Edi Rama, pasi ky i fundit i shkoi për vizitë në shtëpi.

Qazim Rasha shprehet se ia ka bërë të qartë që në takimin e parë kreut të qeverisë se pensioni që shteti do caktonte do të shkonte për fëmijët në nëvojë, ashtu si edhe ndodhi.

Ai ka treguar se nuk e ka pranuar pensionin, por ka kërkuar vetëm që e vërteta të zbardhet.

Babai i Klodianit: Kryeministrit i thashë: Kryeministër, unë jam kryetar i familjes, ti je kryetar i shtetit. Je ai që do i mbrosh si fëmijët e mi, njësoj si të tutë. Nëse ke ardhur për ngushëllim je i mirëpritur si çdo qytetar.

Nuk kërkoj asnjë lloj lëmoshe, apo mëshire, se i kam rritë fëmijët me djersën e ballit.

Shtetit nuk i kërkoj ndihmë, por dinjitetin e familjes sime. Nëse e mendoni si unë ju faleminderit. Unë nuk kam nevojë për para, por kam nevojë që çështja të zbardhet dhe të shërohet një pjesë e plagës.

Nëse ju e ndjeni se jeni pjesë e fajit, ti vendos 700 pensione, unë sot e deklaroj jepja njerëzve të varfër, fëmijëve të sëmurë, të gëzojnë ata prindërit shëndetin e fëmijës së tyre.