Nuk i ndaloi policisë dhe u nxorri armën/ Zbulohet e shkuara e errët e 25 vjeçarit që u vra nga Policia në mesnatë

Në një njoftim të dytë sqarues për ngjarjen, Policia njofton se grupi i hetimit i drejtuar nga Prokurori dhe SHÇBA, kanë gjetur në vendngjarje një armë zjarri pistoletë që dyshohet se i përkiste 25 vjeçarit Rasha.

“Në vijim të veprimeve hetimore të kryera nga Grupi i Posaçëm Hetimor i përbërë nga SHÇBA dhe Policia nën drejtimin e Prokurorit gjatë kqyrjes së vendit të ngjarjes dhe zonës përreth u bë e mundur gjetja e armës së zjarrit që dyshohet se i përkiste shtetasit K.R, i cili nuk iu bind urdhërit të Punonjësit të Policisë për të ndaluar.

U sekuestrua në cilësinë e provës materiale armë e zjarrit pistoletë me një krehër me fishekë. Vijon puna intensive nga grupi hetimor nën drejtimin e Prokurorit për zbardhjen e plotë të dinamikës së ngjarjes”, njofton Policia.

Kujtojmë se, i riu pas mesnatës është konstatuar nga patrulla duke bërë lëvizje të dyshimta në rrugën “Dritan Hoxha”. Menjëherë i është bërë thirrje për të ndaluar por ai nuk i ëhstë bindur urdhrit dhe është larguar me vrap.

Efektivët e kanë ndjekur dhe kur janë afruar në një zonë pa ndriçim, 25 vjeçari i ka drejtuar atyre një send të fortë në dukje armë zjarri, që në fillim nuk është konfirmuar. Por grupi i hetimit i drejtuar nga Prokurori ka gjetur në vendngjarje një armë zjarri dhe ka konfirmuar se efektivët janë përballur me një person të armatosur.

Në kushtet e vetëmbrojtjes, efektivi me inicialet N.H ka qëlluar dhe ka plagosur të riun. Ai është transportuar në spital, por nuk ka mundur të mbijetojë. Ndërkohë, efektivi ndodhet në ambientet e Drejtorisë së Policisë dhe po merret në pyetje për zbardhjen e plotë të ngjarjes.

I riu nuk është një person i panjohur për Policinë pasi ka qenë i dënuar më parë për  dy vepra penale “Plagosje e lehtë me dashje” dhe “Heqje e paligjshme e lirisë”.