“Nëse një gjethe lëvizte në kryeministri…” Berisha kujton 21 janarin dhe bën deklaratën e fortë: Rama do e kishte në lule të ballit nga 5 snajperë

Kryeministri Sali Berisha ka bërë një deklaratë të fortë mbrëmjen e sotme në Euronews, ku u shpreh se nëse Edi Rama do të kishte bërë sikur edhe lëvizjen më të vogël në 22 janar 2011, 1 ditë pas protestës së dhunshme, atëherë do ta kishte plumbin në lule të ballit nga 5 snajperë.

Ai tha se ishte Thomas Countryman që ndërmjetësonte mes tij dhe Ramës pas ngjarjes së 21-janarit. Ai e përmendi emrin e diplomatit amerikan pasi kujtoi se të nesërmen e 22 janarit, opozita e asaj kohe “jo më kot zhvilloi protestë të qetë” pasi sipas Berishës kishte dështuar “misionin për puç shteti” dhe kishte marrë kërcënim se do të shtypej sërish nëse do të përsëriste të njëjtën përpjekje.

“I thashë atij zyrtari shumë të lartë që ndërmjetësonte që t’i thoshte se nëse një gjethe lëvizte nesër në territorin e Kryeministrisë ai do ta kishte në lule të ballit nga pesë snajperë. E keni dëgjuar bashkëshorten e tij të thoshte se u kishin thënë shërbimet e huaja se do ta vrisnin?! I thashë unë, jo shërbimet e huaja, unë u thashë ndërmjetësve që t’i thonë… dhe pse s’preku ai asnjë gjethe të nesërmen” – tha ish-kryeministri duke përmendur si emër ndërmjetësi diplomatin Countryman, i cili pak muaj më pas do të merrte detyrën e ndihmës-sekretarit të Shtetit për Sigurinë.

“Kjo funksionoi, doli të nesërmen si çeçoja, i zbutur siç ishte dhe në fund bëri një intervistë e shoqja [e Ramës] dhe tha se i kishin thënë shërbimet e huaja se do ta vrisnin, jo, unë çova fjalë, i thashë, por të tjerët i pruri mish-për-top, vetë i mbushi [mbathjet] e veta dhe u tërhoq,” – u shpreh Berisha në Euronews.