Mbante postin e lartë në qeveri/ Pas lajmeve se u kap me ‘mall’, zv.kryeministri shkarkon nga detyra Shpat Kasapin

Ditën e sotme në media qarkulloi lajmi se Shpat Kasapi është kapur nga policia me një sasi kokaine.

Menjëherë pas kësaj, zv.kryeministri i Maqedonisë së Veriut, Artan Grubi e ka shkarkuar nga detyra këngëtarin e njohur, i cili mbante postin e këshilltarit të tij.

Grubi konfirmoi lajmin e shkarkimit të Shpat Kasapit për Klan Kosova. Ndërkohë vetë këngëtari i hodhi poshtë lajmet se është arrestuar dhe kapur me drogë duke i konsideruar shpifje.

Ai publikoi pamjet në një lokal në kryeqyetin e Shqipërisë dhe shkroi: “Në Tiranë për qejf, ju më nxorrët në burg”, duke shoqëruar postimin me emoji duke qeshur me lot.

Më pas shtoi: “Ju përshëndes dhe faleminderit për shpifjet.”

Mediat maqedonase raportuan diten e sotme, se Shpat Kasapi, i cili mbante gjithashtu postin e këshilltarit të Artan Grubit, ishte kapur me kokaine.

Sipas tyre kjo ka ndodhur para një muaji në lagjen Gjorce Petrov në afërsi të SP PLANET.

Bëhet e ditur se këngëtari është arrestuar dhe ndaj tij është ngritur padi penale, por që më pas është liruar dhe po gjykohet në liri.