E plagosi për motive pronësie/ Policia arreston autorin, qëlloi lezhjanin me dy plumba në sy të fëmijëve (EMRI)

Autori i dyshuar i plagosjes së Hilë Gjinit në fsatin Balldren të Lezhës, është identifikuar si shtetasi Gjergji Gjini, 69 vjeç.

Ky i fundit mësohet se është arrestuar nga policia pas dy orësh ndjekje.

Ngjarja e rëndë ndodhi në orën 08.00 të mëngjesit të sotëm, teksa i plagosuri Hilë Gjini po dërgonte fëmijët në shkollë.

Në rrugën para shtëpisë ai është përballur me bashkëfshatarin e tij, i cili e ka qëlluar me dy plumba në bark.

Ndërkohë ende nuk dihet nëse mes  dy banorëve të Balldrenit ka patur konflikte të mëparshme.

Dyshohet se fëmijët kanë parë gjithë skenën pasi pas pak do të shkonin në shkollë të shoqëruar nga babai.

Në makinë me ta ndodhej dhe bashkëshortja.

Sipas informacioneve i plagosuri tashmë ndodhet jashtë rrezikut për jetën.

Pas dy orësh Gjergji Gjini është prangosur nga blutë e Lezhës.

NJOFTIMI ZYRTAR I POLICISE

Policia e Lezhës zbardhi dhe dokumentoi në kohë rekord ngjarjen e ndodhur mëngjesin e sotëm, ku mbeti i plagosur me armë zjarri shtetasi H. Gj.

Kapet pas dy orë ndjekjeje nga shërbimet e Policisë së Lezhës, autori i dyshuar i plagosjes me armë zjarri të 43-vjeçarit. Shërbimet e Policisë gjetën dhe sekuestruan edhe armën e zjarrit tip “Pushkë”, me të cilën autori kreu plagosjen.

Policia e Lezhës, menjëherë pas njoftimit të marrë për ngjarjen e ndodhur në fshatin Balldre, Lezhë, organizoi punën dhe falë reagimit në kohë dhe veprimeve të shpejta e profesionale bëri të mundur që pas dy orë ndjekjeje dhe kërkimesh, falë edhe mbështetjes së qytetarëve, të kapë në rrethinat e fshatit Balldre dhe të vërë në pranga shtetasin Gj. Gj., 69 vjeç, banues në Balldre.

Ky shtetas dyshohet se për motive pronësie ka plagosur në këmbë, me armë zjarri, shtetasin H. Gj., i cili ndodhet në spital, nën kujdesin e mjekëve, jashtë rrezikut për jetën.

Strukturat hetimore të DVP Lezhë, nën drejtimin e Prokurorisë së Rrethit Gjyqësor Lezhë, po vijojnë punën për dokumentimin e plotë te kësaj ngjarjeje.