Dalin detajet e rënda/ Po dërgonte fëmijët në shkollë, si u qëllua dy herë në bark i plagosuri nga Lezha

Personi që ka mbetur i plagosur mëngjesin e sotëm në fshatin Balldren të Lezhës, është identifikuar si 40-vjeçari Hilë Gjini.

Mësohet se ngjarja e rëndë ka ndodhur sot në orën 08:00, në momentin që i plagosuri ka dalë nga shtëpia për të dërguar fëmijët në shkolle me makinë.

Më pas ai është përballur me një bashkëfshatar të tijin, i cili e ka qëlluar dy herë më pistoletë në bark.

Ende nuk dihet nëse e gjitha kjo ka ndodhur si pasojë e ndonjë konflikti mes tyre apo përplasje verbale të momentit.

Dyshohet se fëmijet e Gjinit e kanë parë skenën, ku në makinë është gjendur dhe bashkëshortja.

Më pas autoambulanca ka mbërritur në fshat për të dërguar Hilë Gjinin në spitalin e Lezhës, nga ku raportohet se ai është në gjendje të rëndë për jetën.

Forca të shumta Policie, siç shihet në pamjet e mëposhtme, kanë shkuar drejt vendngjarjes për zbardhjen e saj dhe kapjen e autorit.

Sipas informacioneve autori është bashkëfshatar me Hilë Gjinin dhe është identifikuar si shtetasi me inicialet Gj.Gj.