Në kohën që pandemia vijon të shkaktojë shifra të larta të infektuarish dhe viktimash në vend, figura të ndryshme publike japin mendimin e tyrë në lidhje me këtë situatë.
Njëri prej tyre është dhe eksperti i ekonomisë Dritan Shano.
Ky i fundit shprehet se izolimi nuk është zgjidhja e duhur për të menaxhuar këtë gjendje, pasi sipas tij nuk ka prova që ka prodhuar ruajtje të jetëve, por janë humbur më shumë jetë për shkak të vetëvrasjeve apo sëmundjeve të patrajtuara.
Në emisionin “ABC e Mëngjesit” , Shano deklaroi se një izolim tjetër do të ishte katastrofë për qytetarët, ndërsa bëri apel që të mos shkohet në një mbyllje të dytë dhe kryeministri të tërhiqet nga një qëndrim i tillë.
“Është krijuar ideja se virusi mund të mundet me mjete politike dhe administrative. Kjo është një formë diktature më ekstreme, gjithë pandemia ka eliminuar debatin, nuk ka më debat. Nuk ekziston asnjë metodë magjike që një virus kur shfaqet të eliminohet.
Çdo virus kur ka dalë për herë të parë është sjellë gjithmonë në këtë formë. Të lindurit e 2020 apo 2021 do e kenë paketë virusin në trupin e tyre. Masat që duhet të marrë një qeveri kudo në botë, duhet të jenë masa serioze.
Duhet kuptuar se kush janë grupmoshat që godet më shumë virusi. Nuk mund të përdorësh të njëjtën kurë për të gjithë njerëzit. Theksoj se do të ishte katastrofë për shqiptarët një izolim i dytë”, tha eksperti i ekonomisë.
Po ashtu ai u shpreh se shoqëria shqiptare nga pikëpamja ekonomike dhe sociale, nuk e përballon dot më një izolim të dytë.
“Shqipërisë nuk i duhet një Komitet Ekspertësh që kanë një mendim ndryshe. Sot që flasim shqiptarët po harxhojnë kursimet e tyre të fundit.
Shqiptarët nuk kanë më asnjë yndyrë në portofol dhe për këtë arsye i them kryeministrit të mos shkojë në një mbyllje të dytë. Individ shqiptar është i pasigurt se çfarë mund të ndodhë”, tha ndër të tjera Shano.
