LIGJET E BIZNESIT
Gjatë fjalës së tij në seancën që po mbahet aktualisht në Kuvend, kryeministri Edi Rama ka folur për rindërtimin dhe pandeminë.
Me tone të ashpra, nuk ka lënë pa ironizuar opozitën e bashkuar, dhe shtoi se shqiptarët ftohen sot të votojnë Lulin, për të pasur dhe Monikën dhe Ilirin, dhe Saliun si luan dhe jo si lepur.
“Shqiptarët në 2013 bënë zgjedhjen e duhur, ndërsa në 2020 janë të njëjtët njerëz që shkaktuan 1997”, tha Rama. Ai u shpreh se ne nuk flasim për të kapur 1 votë aty dhe dy atje, por ne atë që themi e bëjmë.
“Ja shëndetësinë falas, ne kemi bërë hapa në drejtim të këtij premtimi. Kemi rimbursuar 600 mijë shqiptarë nga pikëpamja shëndetësore. Sot që flasim janë 110 mln dollarë që paguan qeveria për ilaçet e shqiptarëve”, tha Rama.
Lidhur me procesin e rindërtimit, Rama tha se më 26 nëntor do të hapen një numër jo i vogël shkollash, që u shkatërruan nga tërmeti i një viti më parë.
“Shqiptarët e goditur nga tërmeti tragjik i 26 nëntorit kanë filluar të hyjnë në banesat e reja, ashtu sikundër po ndërtohen ditë për ditë banesa dhe për herë të parë, në këtë vend po ndërtohen lagje të reja, me të gjitha hapësirat e nevojshme”, tha Rama.
Gjithsesi Kryeministri nuk dha shifra se sa qytetarë kanë arritur të marrin banesat e tyre të reja.
“Krizën nga tërmeti ne e kthyem në shpresë për shqiptarët. Ne nuk i lamë familjet e dëmtuara nga tërmeti sikundër u lanë ato familjet e përmbytura në Shkodër. Çfarë do të kishte ndodhur sikur të ishin ato në detyrë? Çfarë do të ndodhte me virusin sikur të ishin ato në detyrë, ku spitalet nuk kishin ilaçe?
Ata që kishin mundësinë ta bënin Shqipërinë më të fortë e legenisën fare dhe sot derdhin lotë krokodili”, tha Rama, duke shtuar se “vetëm budallai nuk ndryshon mendim.
Rindërtimi sipas kryeministrit po ecën me ritme shumë të shpejta.
Ai nuk kurseu batutat me deputetët, duke i quajtur tapë-topi.
“Ju jeni tapa, ata jashtë janë topi. Pra jeni tap-topi”, u tha Rama, duke shtuar se “sa kohë shqiptarët do të trajtohen si budallenj, atëherë do të humbin”.
“Ju jeni fitimtarë të përkohshëm, keni disa cilësi më të mira se ata që ishin para jush dhe po ju japim mundësinë që të reflektoni”, tha Rama. Në vijim ai shtoi se buxheti i 2021 konfirmon se taksa zero për biznesin e vogël do të mbetet aty dhe deri në 2029 këto biznese nuk do të kenë TVSH deri në 100 mijë dollarë xhiro.
