A do të rikthehet karantina? Flet ministrja Manastirliu: Ja çfarë do të ndodhë pas 2 dhjetorit

Ministrja e Shëndetësisë Ogerta Manastirliu ka folur në lidhje me situatën e pandemisë së koronavirusit në Shqipëri.

E pyetur nëse do të rikthehet karantina pas datës 2 dhjetor, ajo u shpreh se nuk e dëshiron mbylljen, por masat kufizuese do të vlerësohen në bazë të situatës.

“Situata është shumë dinamike, masat janë fleksible. Komiteti i Ekspertëve po monitoron cdo ditë situatën. Ne do ta vlerësojmë situatën. Shpresojmë në bashkëpunimin e qytetarëve sepse janë ata që do të tregojnë durim që në këto 3 javë që ne duam të kufizojmë përhapjen e virusit, të mundemi të zbatojmë rregullat.

Ne nuk e duam mbylljen, por masat kufizuese do të vlerësohen në bazë të situatës, sepse jemi përballë të panjohurave.  Ky virus ka edhe të panjohura edhe të njohura. Covid-19 ndërpret transmetueshmërisë kur nuk ka terren dhe kjo arrihet vetëm me maska e zbatim të masave”, u shpreh Manastirliu për emisionin “Real Story”.