‘A do të ketë një izolim të dytë?’ Brataj bën deklaratën që nuk pritej: Nuk përjashtohet

Drejtori i Urgjencës Kombëtare Skënder Brataj nuk e ka përjashtuar mundësinë e mbylljes totale të vendit në rast se shifrat e të infektuarve nga pandemia marrin përmasa të mëdha.

Në momentin që u pyet për skenarët dhe izolimin e vendit, Brataj deklaroi në A2 se ende nuk është marrë një vendim i tillë.

Ai theksoi se asnjë lloj mase nuk përjashtohet nga skenarët e qeverisë, të cilët do të aplikohen në bazë të rasteve ditore.

“Nuk mund të flasim për afër apo larg, është në bazë të asaj çfarë ndodh. Nga momenti në moment, mund të merret edhe një masë, qoftë edhe drastike. Nuk është marrë vendim, dhe nuk më takon mua ta them diçka të tillë.

Unë jap mendimin tim personal si specialist, ndërsa vendimi është kolegjial dhe ekzekutivi është ai që vendos në bazë të këshillimeve që ka marrë nga ekspertët. Nuk përjashtohet një masë e tillë në kushtet e sotme, në kushtet e pandemisë, po e bën gjithë bota, nuk është se po e bëjmë vetëm ne. Por nuk janë të përjashtuara asnjë nga gjitha masat”, u shpreh ai.