LIGJET E BIZNESIT
Ditën e djeshme Policia e Shtetit ka shpallur në kërkim një prej autorëve të dyshuar të vrasjes së Bujar Çelës, vëllait të Talo Çelës, i cili u ekzekutua në një lokal në Bradashesh.
Ndërkohë ditën e sotme është zbardhur dhe identiteti i 35-vjeçarit.
Bëhet fjalë për shtetasin Nuredin Dumani, me origjinë nga Dibra por banues në Durrës.
I riu konsiderohet si i rrezikshem dhe ishte në kërkim prej një viti, pasi akuzohet dhe për krime të tjera.
Dumani dyshohet se ka vrarë vëllezërit Haxhia në Durrës dhe Klevis Kapllanajn në Rrogozhinë.
Gjykata e Elbasanit ka caktuar masën e sigurisë “arrest me burg” në mungesë për të dyshuarin si ekzekutor të Bujar Çelës në Elbasan, por ka lëshuar gjithsej 5 urdhër-arreste.
Asnjë nga urdhër arrestet nuk është ekzekutuar. Dyshohet se Erion Alibej është urdhëruesi i vrasjeve. Burime nga policia bëjnë me dije se dy të tjerë luajtën rolin e vëzhguesit në vrasjen e Bujar Çelës.
Dumani është identifikuar nga kamerat e sigurisë dhe është parë që ka qëlluar ndaj Bujar Çelës me një armë tip pistoletë. Dumani akuzohet për “vrasje me paramendim e kryer në bashkëpunim” dhe “armëmbajtje pa leje”.
