Rritja e frikshme e rasteve të reja, shefja në ISHP zbulon dy arsyet e forta që kanë ndikuar

Ishte rritja e frikshme e rasteve të reja me COVID19 që e bëri qeverinë të merrte masa të rrepta, duke e bërë maskën me detyrim dhe në rrugë.

Ndërkohë në lidhje me këtë  temë, ka folur dhe shefja e Epidemiologjisë dhe Survejancës në Institutin e Shëndetit Publik, Eugena Tomini.

Kjo e fundit ka deklaruar se rritja e rasteve të reja në vendin tonë ka ndodhur si pasojë e ndikimit të dy faktorëve: Hapja e bareve dhe restoranteve dhe rikthimi nga pushimet.

“Ne mbyllëm një javë tjetër me pozitivitet të lartë. Ndërkohë, kemi edhe rritje të personave të shtruar në spital dhe atyre që kanë kërkuar terapi intensive. Pozitiviteti vjen si rrjedhojë e disa ndërhyrjeve, duke filluar që nga kthimi i pushuesve nga periudha e verës. Kjo do të kishte një ndikim dhe e ka dhënë një gjë të tillë. Një ndikim tjetër kanë dhënë edhe baret dhe restorantet.

Mbas 14 shtatorit, 14 tetori përkoi me një rritje të rasteve të reja. Duhet theksuar se edhe ndërgjegjësimi i popullatës ka pasur një ndikim madhor sa i përket mosrespektimit të masave. Rrethi i ngushtë i kontakteve me rastet pozitiv na është afruar shumë. Parashikimi është se jo e gjithë popullata mund të infektohet. Ne kemi ndjekur një strategji të rasteve të dyshuara dhe kontakteve të tyre dhe nuk është se kemi gabuar shumë.

Studime edhe për një test të shpejt, Akademia e Shkencave, QSUT, i kanë bërë gjatë kësaj periudhe. Kemi qenë nga 400 testime, kemi kaluar në 1200 testime. Strategjia e vjeshtë-dimër do të shtojë numrin e testimeve. Prandaj testimet në vijim do të kenë tendencë të rriten”,-tha Tomini.