Reshje shiu dhe shtrëngata në këto zona/ Mësoni si do të jetë moti sot dhe nesër

Orët e para të mëngjesit të ditës së sotme do të shoqërohen me vranësira mesatare deri të dendura shoqëruar me reshje shiu të herëpashershme me intensitet të ulët e lokalisht në relievet e larta malore në formë shtrëngatash afatshkurtër.

Por kjo paqëndrueshmëri e motit nuk do të zgjasë shumë.

Pjesa tjetër e ditës do të karakterizohet nga një kohë e kthjellët por dhe me alternime vranësirash kalimtare.

Era do të fryjë me drejtim kryesor veriperëndim dhe shpejtësi 1-10m/s dhe lokalisht përgjatë vijës bregdetare deri në 15-17 m/s.

Ndërsa ditën e shtunë parashikohet një përmirësim i kushteve atmosferike.

Kështu, moti pritet të jetë i kthjellët në të gjithë territorin e vendit me përjashtim të vranësirave të pakta në zonën e verilindjes.

Era do të fryjë me drejtim kryesor veriperëndim dhe shpejtësi 1-8m/s dhe lokalisht përgjatë vijës bregdetare deri në 12-15m/s.