Përkeqësohet gjendja e naftëtarëve/ Në ditën e 12 të grevës së urisë, kreu i sindikatës shtrohet në spital

Ditën e sotme shënohet dhe dita e 12 e grevës së urisë të naftëtarëve në Ballsh.

Mësohet se kreu i Sindikatës së Naftëtarëve Sokol Dautaj është dërguar me urgjencë në spital.

Sipas mjekes që po ndjek situatën, Dautaj është paraqitur me dhimbje të fortë të kokës, me lodhje dhe dobësi, në një kohë që ka rezultuar dhe me hipertension.

“Sokol Dautaj është paraqitur me një dhimbje të fortë të kokës, me një lodhje, dobësi. Me ekzaminimin që i kemi bërë rezulton që të ketë hipertension. Duket që është i dehidruar, ka marrë mjekim për këto probleme që kemi parë“, ka thënë mjekja.

Vetëm ditën e djeshme naftëtarët e Ballshit morën vendimin drastik, duke refuzuar shërbimin mjekësor dhe mediat të futeshin në ambientet e grevës. Ishte Sokol Dautaj ai që mbylli derën me kyç, si dhe njoftoi mediat për këtë vendim.