“Mos hani kot atë që s’thuhet” Halit Valteri revoltohet në Kuvend: Kemi humbur familjarë, shumë njerëz tallen me këtë flamë

Ka vijuar seanca e sotme parlamentare me debate të forta mes deputetëve.

Tema kryesore ka qenë mënyra sesi po menaxhohet pandemia COVID19 si dhe plani i vaksinimit të popullatës nga autoritetet shtetërore.

Fillimisht ishte deputeti Ralf Gjoni ai që nisi debatin, duke kundërshtuar vendimin e qeverisë që të blejë para kohe vaksinën që ende nuk ka dalë.

Gjoni u shpreh se kishte respekt maksimal për punën e mjekëve por nuk mund të hidhen para kot për një gjë që nuk ka siguri ende.

Kjo deklaratë mbi pasigurinë e vaksinës dhe planit të Bill Gates për vaksinimin e popullatave, duke vendosur në diskutim ekzistencën e Covidit, solli acarimin e deputetit Halit Valteri. Valteri u shpreh se të gjithë ata që dalin hapur kundër mjekëve dhe ministrisë së Shëndetësisë, duhet të hanë atë që s’thuhet, pasi ai dhe shqiptarët kanë humbur familjarë në këtë betejë.

“Po dëgjojmë nga kjo foltore shumë njerëz që po tallen me këtë flamë, ku ne kemi humbur familjar, të afërm, shokë dhe miq. Sot e kësaj dite në Sanatorium vuajnë pacientët. Zonja ministre faleminderit për gjithçka që bëni, dhe faleminderit për gjithë mjekët, faleminderit që rrezikoni jetët tona që të shpëtoni jetën tonë. Nuk ka vend ky parlament për të disinformuar opinionin public. Askush nuk ka fytyrë të vijë këtu dhe të thotë që s’ka COVID. Mjekët, spitalet dhe Ministria kanë nevojë për mbështetjen tonë, ndaj mos hani kot atë që s’thuhet”.- tha Valteri.