Ndryshe nga herët e tjera, këtë vit Çmimi Nobel për Paqen iu akordua Programit Botëror për Ushqimin, organizatë që i përket Kombeve të Bashkuara.
Qendra e saj është në Romë dhe do të nderohet për angazhimin e saj në luftë kundër urisë në botë dhe mundësi më të mira për paqe në rajone në konflikt.
Këto informacione i njoftoi Komiteti Norvegjez i Çmimi Nobel në Oslo.
Programi Botëror i Ushqimit (ËFP) është gjithashtu një forcë lëvizëse në përpjekjet për ta penguar përdorimin e urisë si armë gjatë luftërave dhe konflikteve, tha kryetarja e Komitetet të Çmimit Nobel, Berit Reiss-Andersen.
Sipas saj nderimi me Çmimi Nobel për paqen për këtë organizatë duhet të tërheqë vëmendjen për të uriturit në botë. Edhe para pandemisë së koronës sipas të dhënave të OKB-së në botë vuanin nga uria 690 milion vetë.
Si organizata më e madhe humanitare në botë Programi Botëror për Ushqimin furnizoi me ushqime në vitin 2019 gati 100 milion vetë në 88 vende. ËFP është në gjendje të depërtojë edhe në rajone të vështira për t’u arritur si në Siri ose Jemen, thuhet në fjalën e Komitetit të Çmimit Nobel.