Pas shpërthimit të tritolit që i vendosën në banesë, gazetari Elidon Ndreka ka deklaruar se nuk ka konflikte me asnjë person.
Ai shton se së bashku me familjen janë të shokuar nga kjo ngjarje e rëndë.
Sias policisë, ngjarja ka ndodhur pas mesnate në orën 00.30 minuta në shtëpinë e gazetarit në fshatin Balldre të Lezhës.
Ndërkohë Ndreka është shprehur se nuk ka konflikte pronësie apo konflikte të tjera me banorët e zonës dhe se dyshon se e gjitha ka ndodhur për shkak të profesionit të tij si gazetar.
“Nuk di t’i kem shkelur kujt në kallo”, ka thënë ai për News 24.
“Në vendngjarje ka ardhur Policia dhe ka qëndruar deri në orën 04.30 të mëngjesit. Kanë kryer hetime. Është një ngjarje që na ka shokuar. Presim që policia dhe prokuroria ta hetojë këtë ngjarje dhe t’i shkojë deri në fund.
Në banesën time jetoj me prindërit, bashkëshorten dhe dy vajzat. Kur ndodhi shpërthimi ishim të gjithë në shtëpi. Kur dolëm pamë që dera ishte dëmtuar. Sipas ekspertëve, këto shpërthime janë të vështira për tu zbuluar por autori ka lënë gjurmë.
Prindërit janë në pension, në moshë të thyer. Unë prej vitesh punoj si gazetar dhe nuk e di nëse kam shkelur në kallon e dikujt derisa të arrinin në këtë pikë. Sinqërisht, nuk di t’i kem shkelur dikujt në kallo. Konflike pronësie apo me banorët e tjerë nuk kemi pasur, prindërit janë të moshuar. Dyshoj se ka të bëj me profesionin, por s’di të drejtoj gishtin diku”, është shprehur gazetari Elidon Ndreka.