Një nga të dyshuarit për vjedhjen e 2 milionë eurove të thesarit të Shtetit, Kadri Shala ka treguar si kanë përfunduar paratë në llogarinë e tij. Përmes vëllait të tij ai ka dërguar një letër të shkruar me dorë në redaksinë e Gazetës Express, ku ka rrëfyer ngjarjen.
Në letër që mban datën 24 tetor 2020, Shala ka treguar historinë se si ka përfunduar një shumë kaq e madhe e parave nga buxheti i shtetit në llogarinë e firmës së tij, ai e ka përshkruan thjeshte këtë histori e cila është skandali me i madh qeveritar në historinë e Kosovës. Shala thotë se thjesht paratë iu transferuan në llogarinë e tij bankare.
“Diku rreth orës 3 kam shkuar në bankomat të TEB Bankës në Prizren për t’i tërhequr një shumë të mjeteve për nevojat e mija përsonale nga llogaria e firmës të cilës jam përfaqësues, LDA Gruop, pasi në llogari kam pasur mjete të mjaftueshme afërsisht 20 000 euro. Në atë moment kam vërejtur se shuma në llogari ishte mbi vlerën të cilën e kam pasur. Nga ai moment kam menduar se kam pranuar mjete nga kompanitë me të cilat kam punuar por nga përmbaruesit të cilët i kam angazhuar për kompanitë të cilat më kanë obligime,”– shkruan Shala në letrën e tij.
Më pas Shala ka treguar se sapo ka marrë këto para ka nisur t’i shlyej borxhet që ua kishte personave apo kompanive.
“Dhe kështu kam menduar që t’i fshij obligimet që i kam ndaj personave fizik dhe juridik gjegjësit firmave që u kam pasur obligim,”- ka thënë ai.
Gjithashtu ai ka thënë se gjatë kërkimit nga policia e Kosovës, janë përmendur familjarët e tij nga mediat, por ata nuk kanë qenë në dijeni për veprimet e tij.
“Të dashura media, këtu asgjë politike nuk ka mirëpo përfshirja e familjes sime, fëmijëve të mi të cilët as nuk kanë qenë në dijeni apo s’kanë kurrfarë lidhje me rastin, përfshirja e personave juridik dhe fizik ka qenë e tmerrshme, jo etike pa e ditur saktësisht thelbin. Shfrytëzoj rastin t’i kërkoj falje familjes, fëmijëve dhe të gjithë atyre të cilët i kanë etiketuar e që nuk kanë pasur njohuri rreth situates,”-ka thënë ai.
Më 21 tetor janë vjedhur nga Thesari i Shtetit në Kosovë 2 milionë euro. Ministrja e finacave Hykmete Bajrami ka dalë në një koferencë për shtyp ku ka treguar se parat e ndara në 4 transaksione janë dërguar në llogarinë e një operatori ekonomik. Ndërkohë janë tre të dyshuar, njëri prej tyre është Labinot Gruda, i cili është arrestuar, dy të tjerët janë pronarët e kompanisë operative “LDA Group” Sh.P.K, dhe janë arratisur. Prokuroria e Shtetit ka deklaruar se e gjithë vjedhja ka ndodhur për 8 minuta. Ditën e djeshme Thesari i Shtetit në Kosovë i ka kërkuar pronarëve të kompanisë në të cilën dyshohet se janë transferuar paratë që kanë afat 5 ditë që të dorozojnë 2 milionë eurot e vjedhura.