E rëndë/ Koronavirusi i merr jetën specialistes së Autoritetit Shëndetësor Tiranë (EMRI)

Specialistja e promocionit të Shëndetit Publik në Autoritetin Shëndetësor të Tiranës Mimoza Zoraqi, ka ndërruar jetë si pasojë e COVID19.

Lajmin e hidhur e ka bërë me dije ministrja e Shëndetësisë Ogerta Manastirliu.

Me anë të një reagimi në rrjetet sociale, Manastirliu shprehet se Zoraqi ishte një zonjë e mrekullueshme që rrezatonte mirësi, forcë dhe optimizëm me buzëqeshjen e saj të pandarë.

“Dje u nda prej nesh, për shkak të Covid-19, Mimoza Toska Zoraqi, specialiste e promocionit të shëndetit publik, në Autoritetin Shëndetësor të Tiranës. Eshtë një nga ata lajme që të shkaktojnë një hidhërim të papërshkrueshëm.

Moza ishte një zonjë e mrekullueshme, që rrezatonte veç mirësi, forcë dhe optimizëm me buzëqeshjen e saj të pandarë. Ngushëllimet më të sinqerta familjes. U prehsh në paqe, e paharrueshmja Moza!”, shkruan Manastirliu.