LIGJET E BIZNESIT
Një 29-vjeçar shqiptar, i identifikuar si Gentjan Marku është ekstraduar ditën e sotme nga Madridi drejt Tiranës, ku është dënuar për një sërë veprash të rënda kriminale. Sipas njoftimit të Interpol Albania, Marku nga Repsi i Lezhës, kërkohej nga autoritetet shqiptare pasi ndaj tij, Gjykata e Krimeve të Rënda, në vitin 2018 ka dhënë masën “arrest me burg” për një sërë veprash penale si “Trafikimi i lëndëve narkotike, e kryer në bashkëpunim në formën e posaçme të “Grupit të strukturuar kriminal”.
“Vijon bashkëpunimi mes Interpol Tiranës dhe homologëve për kapjen, arrestimin dhe ekstradimin e personave të shpallur në kërkim ndërkombëtar. Si rezultat i bashkëpunimit të Interpol Tirana me Interpol Madrid, falë shkëmbimit tëvazhdueshëm të informacionit, u bë i mundur arrestimi në Spanjë, duke u finalizuar me ekstradimin drejt vendit tonë të shtetasit shqiptar G. M., 29 vjeç, banues në Reps. Ky shtetas ishte i shpallur në kërkim ndërkombëtar nga ZQK Interpol Tirana, pasi Gjykata e Shkallës së Parë për Krimet e Rënda, Tiranë, në vitin 2018, ka vendosur, masën e sigurimit “Arrest me burg”, për veprat penale “Prodhimi dhe shitja e lëndëve narkotike”, “Trafikimi i lëndëve narkotike, e kryer në bashkëpunim në formën e posaçme të “Grupit të strukturuar kriminal”, “Kryerjes së veprave penale nga organizata kriminale dhe grupi i strukturuar kriminal”. Shtetasi G. M., në bashkëpunim me shtetas të tjerë ka qenë pjesë e një grupi të strukturuar kriminal që merrej me trafikimin e lëndëve narkotike,”- njofton Interpol Tirana.
Por kush është Gentjan Marku?
Gentjan Marku është gjithashtu pjesë e dosjes së famshme “339”, si pjesë e një grupi prej 12 personash që akuzohen për tjetërsim të pronave në bregdetin e Lezhës. Ai akuzohet bashkë me Samuel Ndokën, nipin e ish-deputetit Arben Ndoka. Pjesë e këtij grupi janë edhe ish-kampioni i sportit e mundjes Elis Guri Ramadan Dushaj, Rezart Çaçani, Fatbardh Gostini, Neritan Saraçi, Ardit Haxhagiqi, Gentjan Marku, Oltion Noka, Fation Marku, Vilson Ndoka, Elis Guri dhe Luan Boça. Ramadan Dushaj e kamuflonte veprimtarinë e paligjshme të tregtimit të lëndëve narkotike me aktivitetin e grumbullimit dhe shitjes së produkteve bujqësore. Ai mbante me vete mostra të lëndës narkotike, të cilën kërkonte ta shiste./ Dosja.al
