Ashpërsohen masat kundër përhapjes së COVID19 në vendin tonë.
Pas shtimit të numrit të rasteve të reja, zv.ministrja e Shëndetësisë Mira Rakacolli ka dalë me një njoftim të fundit zyrtar.
Ajo ka bërë me dije se Komiteti i Ekspertëve ka dalë në përfundimin që universitetet të zhvillojnë mësim vetëm online për një muaj.
Ndërsa konviktet do të jenë të mbyllura deri në një vendim të dytë.
Gjithashtu numri 2 i shëndetësisë në vend shtoi se po vlerësohet dhe mbyllja e bareve dhe restoranteve pas orës 22.00 në zonën e Ish-Bllokut në Tiranë.
“Komiteti ka vlerësuar se është e nevojshme që të kemi masa shtesë. Në mbledhjen e komitetit të ekspertëve, është analizuar situata dhe risqet, kemi analizuar situatën në Europë e botë, ecurinë e virusit, kemi vendosur të propozojmë unanimisht që në universitete të zhvillohet vetëm mësim online për të paktën 1 muaj. Konviktet do të jenë të mbyllura deri në një vendim të dytë. Komiteti teknik po vlerëson mbylljen e bareve në zonën e bllokut pas orës 22:00, sepse është një zonë me shumë grumbullime gjatë natës. Nëse nuk kemi disiplinë do rrezikojmë mbylljen”, theksoi Rakacolli në fjalën e saj.