Në kohën që disa mjekë po zhvillojnë aktualisht një takim në kryeministri, një pjesë tjetër e mjekëve, infermierëve dhe personelit shëndetësor janë mbledhur në oborrin e QSUT në formë proteste.
Ashtu si paralajmëruan dhe më parë, bluzat e bardha kanë braktisur punën dhe kanë nisur të protestojnë për 4 kërkesat e tyre.
Njëri prej tyre, kirurgu Ibrahim Ruka tha se përfaqësia e mjekëve nuk u takua me kryeministrin Edi Rama dhe as me ministren e Shëndetësisë Ogerta Manastirliu, pasi sipas tij këta të fundit nuk pranuan por nxorën këshilltarët e tyre.
Ai shtoi se sot protesta do të jetë për një orë, ndërsa për më tej do të merret një vendim nga këshilli koordinativ.
“Sot sapo morëm lajmin që dhe kryeministri dhe ministrja nuk kanë pranuar të takohen me përfaqësinë e sindikatës por kanë lënë këshilltarët në dispozicion të tyre. Ky është një mashtrim i madh që i kanë bërë sindikatës dje. Besoj që do mblidhet këshilli koordinativ dhe do vendosë për më tutje. Sot është një orëshe protesta më pas do merret vendim nga këshilli”, deklaroi kirurgu Ruka.
Kërkesat e mjekëve
Mjekët kanë dalë me disa kërkesa:
- Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm.
- Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën dhe pas fatkeqësive të mundshme në këtë luftë.
- Rritje e vlerësueshme e trajtimit financiar të personelit shëndetësor.
- Personelit shëndetësor të çdo niveli t’i sigurohen të gjitha kushtet në punë për parandalimin e infeksionit sipas të gjithave standardeve kombëtare dhe ndërkombëtare.