Duket se kryeministri Edi Rama dhe presidenti Ilir Meta nuk i ndalin ‘kunjat’ ndaj njëri-tjetrit.
Kreu i Shtetit ka marrë pjesë në inagurimin e Qendrës Ndërkombëtare Shkencore për Vjosën, ku është shfaqur krah kryebashkiakut të PS Tërmet Peçi, dhe i është drejtuar qeverisë që të mos lejojë ndërtimin e HEC-eve.
“Kënaqësi të mblidheshim sot në Tepelenë, së bashku me profesorë, shkencëtarë e autoritete vendore, për një ngjarje shumë pozitive, përurimin e Qendrës Ndërkombëtare Shkencore dhe Kërkimore për Vjosën.
E ardhmja e Vjosës nuk mund të jetë kurrsesi shkatërrimi i saj përmes ngritjes së hidrocentaleve, por vetëm shpallja si Park Kombëtar, që do të sillte impakt pozitiv e zhvillim të qëndrueshëm për zonën dhe komunitetin e mrekullueshëm të saj, për sot dhe gjeneratat e ardhshme. Koha që qeveria të dëgjojë zërin e qytetarëve dhe të 776 shkencëtarëve nga e gjithë bota për mbrojtjen e kësaj pasurie natyrore kombëtare dhe ndërkombëtare.”, shkruan Meta duke sfiduar hapur Ramën.
Mirëpo ky i fundit nuk ka zgjedhur të qëndrojë indiferent pas një postimi të tillë.
Rama shprehet se është dakord me Presidentin që e ardhmja nuk është shkatërrimi, por i kujton Hecet në Valbonë, dhe thotë se mirë do ishte që Presidenti ta kishte mbrojtuar atë kur ishte zv.shef i qeverisë Berisha.
“Jam dakord me Ilir Metën që e ardhmja nuk është shkatërrimi, po sa mirë do kishte qenë sikur ta kishte mbrojtur Valbonën nga shkatërrimi kur ishte zv.shef i qeverisë së Saliut, siç mbron sot Vjosën nga rreziku imagjinar i hidrocentraleve që nuk do të ndërtohen!
Qeveria jonë e ka shpallur Park Kombëtar Vjosën e lartme. Ministria jonë e Mjedisit ka refuzuar zyrtarisht të japë leje për projekte HEC-esh në Vjosën e poshtme që do të integrohet me Parkun! Vala shkatërruese e qeverisë së vjetër mbi lumenjtë në tërësi është zmbrapsur ka kohë”, thekson kryeministri.