Ditën e sotme Opozita e Bashkuar i ka dërguar një letër misionit të OSBE/ ODIHR në Shqipëri.
Ata kanë kërkuar përgjigje për 5 çështje themelore.
Ndërkohë në mbledhjen e sotme të Këshillit Politik, Opozita paraqiti një kërkesë konkrete për të marrë asistencën e OSBE/ ODIHR për disa çështje themelore për të cilat palët nuk bien dakord. “Deri tani, PS ka refuzuar t’i bashkohet kërkesës, duke përdorur “sovranitetin” si argument kundër përfshirjes së OSBE/ODIHR, megjithëse kjo është pjesë e marrëveshjeve për reformën zgjedhore”, thuhet në letrën e Opozitës, ndërsa listohen dhe 5 çështjet kyçe.
5 pyetjet kryesore, të ngritura në kërkesën e paraqitur nga opozita:
- A përputhet me standardet ndërkombëtare mekanizmi aktual i Kodit për koalicionet dhe formula e shpërndarjes së mandateve?
- A i lejon listat e hapura mekanizmi dhe formula aktuale dhe a është në përputhje me standardet e OSBE/ODIHR.
- A mund të ndryshohen njëanshmërisht rregullat zgjedhore 6 muaj para zgjedhjeve?
- A minon barazinë në garë dhe a bie ndesh me disa standarde të OSBE/ODIHR ndryshimi i njëanshëm i rregullave shumë afër zgjedhjeve?
- Në kushtet e mosdakordësisë, cila është një zgjidhja në përputhje me standardet e OSBE/ODIHR për zgjedhje demokratike?
Në letrën drejtuar OSBE/ODIHR, ku shpjegohet edhe qendrimi i palëve, opozita thekson se koha e përgjigjes është shumë e rëndësishme.
“Do ta vlerësonim shumë përgjigjen e shpejtë ndaj çështjeve të mësipërme, pasi është shumë e rëndësishme për të adresuar mosmarrëveshjet mes palëve, me synim gjetjen e një zgjidhjeje të pranueshme për palët, që do të krijonte një klimë besimi të qytetarëve në një proces zgjedhor demokratik”, thuhet në kërkesën e Opozitës së Bashkuar drentuar OSBE/ODIHR-it.