Orë pritje me dhimbje, lot dhe shpresë.
Kjo është panorama e asaj që përjetojnë qytetarët përditë në spitalin “Shefqet Ndroqi” në Tiranë, aty ku kanë të afërmit e shtruar me COVID19.
Të shqetësuar dhe duke u vërtitur lart e poshtë spitalit, presin një përgjigje nga mjekët në lidhje me shëndetin e familjarëve të tyre.
Disa qytetarë ndërkohë kanë folur dhe për gazetarët përpara kamerave.
Njëri tha se kishte sjellë ujë dhe ndërresa për babanë, pasi këto kishte kërkuar vetë i ati. Ai tha se komunikon vetëm me doktoreshën.
“Ujë, rroba, ndërresa, ushqimin nuk e di, a është me serume, apo jo. Kam folur vetëm me doktoreshën, më ka thënë këtu këtu ca ka kërkuar babai dhe ato i japim. Telefonin për momentin jo se është në gjendje të rënduar. Uji, ska problem s’më intereson shumë më mjafton vetëm të pijë se është në gjendje të rëndë, e siguroj vetë ska problem, vetëm të bëhet mirë’, tha ai.
“Në gjendje shumë të rëndë. Ne nuk kemi marrë asnjë përgjigje nga mjekët, kemi marrë doktorin, na thotë merr një tjetër, na kanë thënë mos e merrni shumë herë se nuk është në gjendje të mirë. Telefonata e fundit ishte sot në orën 7 të mëngjesit, nuk ishte mirë, fliste përçart, nuk e kuptonim çfarë thoshte, dimë ne se çfarë ndodh aty? Bëj kurajo i themi, ca ti themi, dy fjalë i themi se ai nuk flet dot më gjatë”.
Një tjetër grua, tha se babai i saj ishte rënduar prej tre ditësh.
“Babi im ka 7-8 ditë që ka qenë këtu, kam komunikuar, por ka tre ditë që jo, telefonin ja kanë lënë. Ne nuk e dime ca bëhet brenda, me qa sa na kanë thënë, i kanë filluar ventilimin e ska arritur me e mbajt se është irrituar, e hiqte, e kanë vënë në terapi intensive për 3 ditë, ska arrit mushkëria të funksionojë, e tani është në intubim. Ka tre ditë që s’kam fol me babin, më dhimbsej, në datë 1 kam folur, jam më mirë tha por në fakt nuk u bë më mirë. Mjekët më thonë se është në gjendje kritike. As në Angli nuk të jep kush shpresë”.