“Koha nuk pret më” Meta e nis ditën me fjalët e Papa Franceskut, ja mesazhi domethënës që jep (VIDEO)

Presidenti Ilir Meta e ka nisur ditën sot me një tjetër mesazh të fortë.

Ai ka vendosur të rikthejë në vëmendjen e publikut vizitën historike të Papa Franceskut më 21 shtator 2014 në Tiranë.

Kreu i Shtetit ka zgjedhur fjalët domethënëse me të cilat Papa iu drejtua asokohe shqiptarëve, të cilat ende janë aktuale dhe sot.

“Në 6-vjetorin e vizitës së Tij në Shqipëri, të mos harrojmë porositë e mençura të Papa Françeskut: “Shqiponjat nuk e harrojnë folenë, por fluturojnë lart. Kam parë kaq shumë të rinj, ndaj ju lutem mbajini ata në Atdheun e tyre dhe Shqipëria të shpëtojë nga dimri demografik.

Të bëjmë gjithçka që shqiponjat të qëndrojnë e të kthehen në folenë e tyre, dhe Shqipëria të ngrihet lart, atje ku e meritojnë ëndrrat dhe sakrificat e shqiptarëve, si një vend plotësisht demokratik, i respektuar dhe me dinjitet në Europë”, shkruan Meta.

Presidenti citon fjalët e Papa Franceskut, i cili 6 vite më parë tha “duhet bërë gjithçka për të shtuar shpresën për rininë tonë, sepse ‘Ku ka rini, ka shpresë”.

“Koha nuk pret më! Të kthejmë shpresën për rininë dhe për të gjithë shqiptarët!”, thekson Meta në thirrjen e tij.