Emra të njohur/ OFL zbret në Tiranë, u kërkon deklarimin e pasurisë 4 ‘të fortëve’

Sot Operacioni Forca e Ligjit është ndalur në Tiranë, ku u ka dërguar formularin për deklarimin e pasurisë 4 të dënuarve për vjedhje, vrasje, prodhim dhe shitje të lëndëve narkotike si dhe për grup të strukturuar kriminal.

Kështu, mësohet se nën shënjestër janë vënë Altin Çela, Genci Xhixha, Ergest Zhupani dhe Sulejman Sina.

Altin Çela banues në Tiranë, i dënuar për veprat penale “Prodhimi dhe shitja e narkotikëve” dhe “Armëmbajtja pa leje”;

Genci Xhixha, banues në Tiranë, i dënuar për veprat penale “Prodhimi dhe shitja e narkotikëve ” e kryer në formën e grupit të strukturuar kriminal dhe “Grupi i strukturuar kriminal”;

Xhixha njihet nga drejtësia shqiptare si personi që ka financuar dhe siguruar lëndën e kokainës, e cila vinte nga Kuba dhe përpunohej në laboratorin e Xibrakës, në Elbasan. Ai njihet si koka e Xibrakës.

Ergest Zhupani banues në Tiranë, i dënuar për veprën penale “Vjedhja me armë”;

Zhupani, është 28 vjeçari që në 21 shkurt 2016 ekzekutoi me thikë shokun e tij Arenc Liço, dhe mbi të rendon akuza e “Vrasjes me dashje”.

Sherri me thika ka ndodhur gjatë natës së 21 shkurtit rreth orës 22:00 në një lokal pikë bastesh në zonën e Shkozës, si pasojë e të cilit ka mbetur i vdekur në vend 39-vjeçari Arenc Liço.

Shkak i lindjes së këtij konflikti ka qënë një sherr pasi viktima nuk e kishte ftuar në ditëlindje autorin.

Sulejman Sina banues në Tiranë, i dënuar për veprën penale “Vjedhja me dhunë”.

Njoftimi i OFL:

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

1. Ç., banues në Tiranë, i dënuar për veprat penale “Prodhimi dhe shitja e narkotikëve” dhe “Armëmbajtja pa leje”;
2. Xh., banues në Tiranë, i dënuar për veprat penale “Prodhimi dhe shitja e narkotikëve ” e kryer në formën e grupit të strukturuar kriminal dhe “Grupi i strukturuar kriminal”;
3. Zh., banues në Tiranë, i dënuar për veprën penale “Vjedhja me armë”;
4. S., banues në Tiranë, i dënuar për veprën penale “Vjedhja me dhunë”.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.