E papritur/ EULEX bastis zyrat e organizatës së rëndësishme të UÇK, arrestohet kryetari

Zyrtarët e EULEX kanë rrethuar sot dhe bastisur zyrat e Organizatës së Veteranëve të Luftës së UÇK-së.

Sipas asaj që raportojnë mediat në Kosovë, policë të shumtë janë futur brenda zyrave dhe për pasojë kanë bllokuar të gjithë anëtarët.

Mësohet se pak më parë ka rënë në pranga kreu i OVL-së së UÇK-së Hysni Gucati. Nënkryetari Nasim Haradinaj ka konfirmuar arrestimin e Gucatit, ndërsa ka thënë se sot ai do të dërgohet në Hagë.

Ky operacion vjen pak ditë pasi në zyrat e Organizatës së Veteranëve të Luftës së UÇK-së janë dorëzuar mijëra faqe dokument të dyshuara se janë pjesë e dosjeve që Gjykata Speciale ka në hetim.

Gjatë ditëve të fundit në zyrat e Organizatës së Veteranëve të UÇK-së, një person i panjohur ka lënë dosje të ndryshme që pretendohet se janë të Gjykatës Speciale.  Dyshohet se bëhet fjalë për dosje të presidentit Hashim Thaçi, kryetarit të PDK-së Kadri Veseli dhe ish-kupolës drejtuese të UÇK-së, Azem Syla, Jakup Krasniqi, Rexhep Selimi, Xhavit Haliti etj.