‘Askush s’do donte që dita e parë e shkollës të ishte si kjo e sotmja” Urimi special i Bashës për nxënësit: Nga sjellja juaj varen jetë njerëzish

Kreu i PD Lulzim Basha ka bërë një urim sot për të gjithë nxënësit dhe mësuesit me rastin e fillimit të vitit të ri shkollor.

Me anë të një mesazhi në rrjetet sociale Basha iu drejtua atyre duke thënë se askush nuk do të donte që dita e parë e rrugëtimit të dijes të ishte si kjo e sotmja në mes të pandemisë COVID19.

Lideri demokrat shton ndër të tjera se nga sjellja e nxënësve dhe e mësuesve varen jetë njerëzish.

MESAZHI I BASHES:

Të dashur nxënës dhe mësues që sot nisni vitin e ri shkollor, ju uroj nga zemra suksese!

Urime më të mira për mësuesit tanë që këtë vit do të përballen me orare të zgjatura dhe vështirësi më të mëdha se vitet e tjera. Jam i bindur se me përkushtimin për profesionin dhe kujdesin për nxënësit, do t’ia dilni me sukses për të përballuar këtë realitet të ri dhe sfidues.
Një urim i veçantë nga zemra për vogëlushët që sot ulen për herë të parë në bankat e shkollës. Askush nuk do donte që dita juaj e parë e rrugëtimit drejt dijes të ishte si kjo e sotmja në mes të pandemisë, shoqëruar me masa të veçanta që e bëjnë të vështirë këtë fillim shkolle.

Urime të gjithë gjimnazistëve në këtë vit sfidues! E di se do ta keni të vështirë të ruani distancën, pasi e tillë është edhe energjia e moshës, por ju lus të silleni me vetëdijen se nga sjellja juaj varen jetë njerëzish.

Normaliteti do rikthehet sërish, e ju mund të kapni kohën e humbur me njëri-tjetrin. E vetmja gjë që nuk kthehet është jeta. Prandaj lutja ime për të gjithë ju është: respektoni masat, ruani veten dhe njëri-tjetrin.
Ditë më të mira na presin!