Akoma nuk e keni marrë pagën e luftës? Ja sa afat keni në dispozicion për të aplikuar

Për personat që ende nuk kanë plotësuar dokumentacionin për pagën e luftës, afati i fundit është data 25 shtator.

Së fundmi drejtoresha e përgjithshme e Tatimeve Delina Ibrahimaj ka deklaruar se në total janë 1500 persona që nuk kanë mundur ende të të përfitojnë pagën e luftës, për shkak se nuk kanë dhënë numrin e llogarisë bankare.

E pyetur lidhur me numrin e bizneseve të mbyllura gjatë periudhës së pandemisë, Ibrahimaj solli shifra të cilat sipas saj, vërtetojnë se numri i bizneseve të mbyllura apo që kanë kaluar në statusin pasiv në periudhën janar-qershor për 2020 është më i vogël se i atyre të mbyllura apo që kanë kaluar në statusin pasiv për të njëjtën periudhë të një viti më parë.

Ibrahimaj theksoi se gjatë periudhës së pandemisë nuk ka patur një shtim të mbylljes së aktiviteteve por është reduktuar numri i të punësuarve në biznesin e madh, 14 mijë persona.