Shkatërrohet skema e trafikimit/ Policia zbulon 26 persona të mbyllur në një shtëpi, mes tyre edhe fëmijë

Gjatë një aksioni policer në Prishtinë janë gjetur 26 persona, që mbaheshin për t’u trafikuar në dy shtëpi, ku mes tyre 11 persona ishin fëmijë.

Gjithashtu është arrestuar edhe një 21-vjeçar me iniciale M.S., i cili ishte duke bashkëjetuar me një vajzë 13-vjeçare nga Greqia.

“Policia e Kosovës, gjegjësisht: Sektori Qendror për Hetimin e Trafikimit me Qenie Njerëzore dhe Drejtoria për Migrim dhe të Huaj, të përkrahur nga zyrtarë të Qendrës për Punë Sociale-Prishtinë, më 18.08.2020, me urdhër të gjykatës kanë kontrolluar dy lokacioneve (shtëpi) në Prishtinë, me qëllim të verifikimit të informacioneve se në ato shtëpi qëndrojnë disa shtetas të huaj, të cilët mund të ishin viktima potenciale të trafikimit me qenie njerëzore. Policia, në ato dy lokacione ka hasur në 26 (njëzet e gjashtë) persona, prej tyre 13 fëmijë, të cilët ishin kryesisht në lidhje familjare dhe vinin nga Shqipëria”, thuhet në deklaratën e policisë.