Pak ditë pas problemit të Kakavijës, edhe sot qindra emigrantë kanë mbetur të bllokuar në pikën kufitare të Kapshticës.
Kjo ka ardhur si pasojë e ndërprerjes së punës nga pala greke, pasi është plotësuar kuota prej 300 personash.
Ndërkohë qytetarët në rradhë janë shprehur tepër të revoltuar.
Ata pretendojnë se e kanë bërë tamponin dhe janë brenda rregullave dhe nuk ngurrojnë të hedhin akuza në drejtim të qeverisë Rama, duke u shprehur se kjo e fundit nuk i mbron qytetarët e saj.
“Tamponin e kam bërë pardje, mbaron sot, presim si gjithë të tjerët. Aplikimin online e kam bërë, kam marrë konfirmimin për të kaluar sot. Të shohim ca do bëhet. Unë këtu në doganë do rri.”, u shpreh një qytetar.
Ndërsa një tjetër hodhi akuza ndaj qeverisë Rama: “I paguajmë të gjitha, me tampon, me taksa, jemi me letra të rregullta. Ky është shteti i Edi Ramës. Nuk ka shtet këtu, nuk bëjnë asgjë për ne. Na shkatërruan.”, deklaroi një tjetër.
Kujtojmë se edhe ditën e djeshme u krijua e njëjta situatë, ku mbi 60 emigrantë mbetën të bllokuar pasi ishte plotësuar kuota, duke hyrë në tokën greke vetëm mëngjesin e sotëm.
Nga ana tjetër ka reaguar edhe ministria për Evropën dhe Punët e Jashtme, e cila njoftoi se për 14 ditë të tjera, nga data 1-15 shtator 2020, mbetet në fuqi kufizimi i hyrjes për shtetasit shqiptarë në tokën greke. Kështu, nga pika kufitare e Kakavijës do të futen në shtetin helen vetëm 750 persona në ditë. Ndërsa, nga pika doganore e Kashticës, do të kalojnë për në shtetin grek vetëm 300 persona në ditë. Çdo person duhet të ketë me vete testin e COVID-19 dhe duhet të jetë negativ, si dhe të ketë plotësuar formularin PLF.
