Numri i pacientëve në spitalet COVID dhe qytetet më të prekura, ja si është gjendja në të gjithë Shqipërinë

Sot Ministria e Shëndetësisë bëri me dije se në 24 orët e fundit, 6 persona kanë humbur jetën nga COVID19 dhe u shënuan 143 raste të reja.

Ishte Mirela Cami, drejtoresha e Operatorit të Shërbimeve të Kujdesit Shëndetësor e cila informoi në komunikimin e përditshëm zyrtar se janë shëruar për një ditë 51 qytetarë.

Deri më tani numri i të shëruarve që nga fillimi i pandemisë ka shkuar në 3746.

Por pavarësisht përpjekjeve të mjekëve, 6 persona të shtruar në dy spitalet COVID nuk e kanë fituar dot betejën me virusin.

Mësohet se bëhet fjalë për një 58 vjeçar nga Tepelena, një 71 vjeçar nga Durrësi dhe 4 qytetarë nga Tirana; një 50 vjeçar, një 54 vjeçare, një 67 vjeçar dhe një 70 vjeçar.

Sipas Camit, aktualisht ne spitalin Infektiv dhe “Shefqet Ndroqi” po trajtohen 119 pacientë të konfirmuar pozitivë, 14 pacientë janë në terapi intensive, 3 prej të cilëve të intubuar. Në dy spitalet Covid po vijojnë të trajtohen edhe 14 pacientë të cilët kanë qenë pozitivë me Covid19 dhe aktualisht janë negativizuar, megjithatë vijojnë të marrin trajtim spitalor për pasojat e sëmundjes. Ndërsa vazhdojnë të trajtohen sipas protokolleve përkatëse edhe pacientë të dyshuar të prekur nga virusi i rrezikshëm.

Sikurse është bërë me dijë prej disa ditësh, mjekët e familjes në të gjithë vendin po monitorojnë çdo ditë personat aktivë me Covid19, që janë të izoluar në banesë teksa janë vënë në dispozicion edhe kontaktet për personat të cilët,  në rast se janë prekur dhe kanë shenja të lehta të sëmundjes, ti kontaktojnë nëpërmjet linjës së gjelbër 0800 40 40 me mjekun e familjes. Në rast se simptomat përkeqësohen, duhet të kontaktohet Urgjenca Kombëtare 127, e vetmja strukturë që bën referimin dhe transportin drejt spitaleve COVID.

Shpërndarja gjeografike e rasteve pozitive ditore është si vijon: 45 raste në Tiranë, 31 në Durrës, 17 në Korçë, nga 6 raste në Shkodër, Krujë, Vlorë, nga 4 raste në Elbasan, Lezhë, Lushnje, Tropojë, nga 3 raste në Berat, Gjirokastër, 2 në Kavajë, nga 1 rast në Kukës, Mat, Malësi e Madhe, Prrenjas, Memaliaj, Klos, Gramsh, Shijak.

“Ministria e Shëndetësisë dhe Mbrojtjes Sociale i drejtohet gjithë qytetarëve dhe bizneseve të jenë të kujdesshëm dhe të jenë rigoroz në zbatimin e protokolleve të sigurisë. Kjo është e vetmja mënyrë që të kufizojmë përhapjen e infeksionit. Sjellja individuale është përcaktuese në këtë betejë me Covid19. Është shumë e rëndësishme që jo vetëm personat e konfirmuar pozitivë por edhe ata që janë të dyshuar apo janë në që janë në pritje të përgjigjes së testit, duhet të qëndrojnë të izoluar në shtëpi, pasi janë burim për përhapjen e infeksionit.

COVID-19 – Statistika (15 Gusht 2020) Testime totale 49801. Raste pozitive 7260. Raste të shëruara 3746. Raste Aktive 3289. Humbje jete 225. (Qarku Tiranë 111, Shkodër 34, Durrës 31, Fier 10, Elbasan 8, Korçë 8, Lezhë 6, Kukës 5, Vlorë 5, Dibër 3, Gjirokastër 3, Berat 1)

Shpërndarja gjeografike e rasteve aktive sipas qarqeve: Tiranë 1771. Durrës 433. Shkodër 285. Fier 140. Lezhë 125. Vlorë 118. Korçë 118. Kukës 94. Elbasan 89. Berat 50. Gjirokastër 34. Dibër 32”, bën me dije ministria e Shëndetësisë.