Vijon situata problematike në pikën kufitare të Kakavijës.
Në lidhje me ketë gjendje shqetësuese prej tre ditësh tashmë, ka folur dhe zv.ministri i Jashtëm, Agron Tare.
Ai ka treguar dhe negociatat e fundit që janë bërë me palën greke për të lehtësuar situatën.
Gjatë një prononcimi për Report TV, Tare është shprehur se testi nga pala greke do të bëhet me kampionim, 1 ne 10 dhe jo më për të gjithë qytetarët.
“Në këto momente është hapur kufiri dhe po kalojnë qytetarë, se ishte bllokuar. Kjo situatë është në të gjithë botën, janë kushte të sigurisë, jo se grekët kanë bllokuar. Ministria e Brendshme greke është në debat me ministrinë e Brendshme për të lehtësuar kalimin e udhëtarëve në Kakavijë. Deri tani ka qenë e bllokuar, se mjekët grek kanë pasur probleme, logjistike dhe materiale, nuk kanë pasur tamponë.
Tani do hapet, do kalojnë me tampon, po diskutohet që të hiqet tamponi dhe ta bëjnë me kampion, jo të gjithë, por disa do e bëjnë. Që t’ua bëj më të thjeshtë, nëse kalojmë 100 makina, 10 qytetarë mund t’u bëhet tamponi, të tjerëve jo. Kjo situatë do jetë nga sot, pastaj në varësi të shifrave do shihet, se mund të mbyllet fare kufiri nëse ka raste të reja shumë“, deklaroi Tare ndër të tjera.