“30 vjet me ujëra të zeza”/ Rama publikon investimin në plazhin e Potamit

Kryeministri Edi Rama ka publikuar një video nga plazhi i Potamit, në Himarë, një nga perlat e bregdetit tonë. Rama tregon se ka përfunduar i gjithë sistemi i ujësjellës-kanalizimit.

Ndër të tjera, Rama shprehet se ka ende shumë punë për të bërë, por nuk mundet kurrësesi kjo qeveri të lajë tërë kusuret e dekadave të mëparshme.

“Patjetër patjetër, ka ende plot për t’u bërë për Shqipërinë, ujësjellës e kanalizime e jo vetëm, prandaj edhe vërejtje e kritika mund të bësh plot, sa të duash, por s’do lodhem së përsërituri se tërë kusuret e dekadave të tëra s’mund t’i kërkohen kësaj qeverie, ashtu sikundër s’ka krahasim të mundshëm mes kësaj qeverie e të mëparshmeve dhe mes Shqipërisë sot e asaj 7 vite më parë…

Ja, plazhi i Potamit, një nga perlat e bregdetit jonian, deri dje, për 30 vjet e radhë blu nga larg e me ujëra të zeza nga poshtë, ndërsa sot kristal pas sistemimit përfundimtar të kanalizimeve. Pamjet flasin vetë”, shkruan Rama.