Pandemia vazhdon të jetë e pranishme me numra të shtuar dhe me humbje jete në vendin tonë.
Mjeku Pëllumb Pipero ka folur rreth situatës së ditëve të fundit dhe paralajmëron se gjatë gushtit, por edhe gjatë dimrit do të ketë rritje të infektimeve.
Mjeku infeksionist deklaron se qytetarët dhe sistemi shëndetësor duhet të mësohen të bashkëjetojnë me virusin sepse ai do të jetë gjatë midis nesh.
“Situata nuk është e mirë, është serioze, për t’u shqetësuar por në asnjë mënyrë nuk mund të themi që është jashtë kontrollit. Po të ishte jashtë kontrollit, nuk do të kishte gjurmim, testim, izolim, shtrime në spital…
Por gjithsesi do të thosha që rastet e shtruara në spital janë serioze dhe duhet të na bëjnë të mendojnë për përgjegjësitë e gjithsecilit. Virusi është ende midis nesh. Në këtë situatë, duke qenë se e konsiderojmë veten të gjithë së bashku, të gjithë në një varkë, duhet të ruhemi maksimalisht duke mbrojtur edhe të tjerët.
Do të futen në lojë edhe spitalet rajonale, virusi do të na shoqërojë për një kohë të gjatë, duhet të mësohemi të bashkëjetojë me të jo vetëm qytetari por edhe sistemi shëndetësor. Sepse ka edhe sëmundje të tjera kronike, vjen gripi stinor. Gjasat janë që ne ende të kemi luhatje me ngritje dhe ulje të numrave pozitivë. Ka indikatorë që dëshmojnë se mund të kemi numra të shtuar gjatë Gushtit, unë mendoj që numrat në këto shifra do luhaten edhe në Gusht”, deklaroi Pipero në Syri TV.