Presidenti Ilir Meta i ka dërguar një mesazh kryeministrit Edi Rama, duke treguar se është kundër datës 30 korrik, të caktuar nga mazhoranca për të votuar ndryshimet kushtetuese në Kuvend.
Meta deklaroi se nuk ka për ta njohur 30 korrikun, por shtoi se nuk mund të ndalojë asnjë që të “çmendet”.
“Kush shpik data që minojnë 5 Qershorin duhet ta dijë se nuk ka vetëm 30 korrik, ka edhe 31 korrik”, tha Meta duke vijuar: “Dhe pastaj nuk ka më rikthim në tryeza nga ata që përmbysin tryeza, dhe kërkim të të drejtave që i takojnë një pakice pasi ke dhënë shembullin më të poshtër dhe kriminal sesi për interesa të pushtetit tënd je i gatshëm të përmbysësh të ardhmen europiane të vendit tënd.”
Pjesë nga deklarata e Metës:
Kush e ka vendosur 30 Korrikun? Ç’është ky afat? BE? SHBA? Bundestagu? Kush e ka shpikur 30 Korrikun, nuk e kuptoj. Ekziston vetëm një datë 5 Qershori. Dhe nëse duhet të shikohet një element i 5 Qershorit ajo duhet të shikohet në mënyrë konsensuale me ekspertë ndërkombëtarë.
Unë nuk ndaloj asnjë njeri të çmendet, mos më bëni mua përgjegjës për njerëz që nuk kontrollojnë dot dozat e optimizmit të tyre. Edhe Haxhi Qamili nisi revolucion kundër Europës, por si përfundoi e dimë të gjithë atë punë. Kush prek 5 Qershorin, apo kush shpik një datë tjetër, duhet ta dijë që nuk ka vetëm 30 korrik, ka dhe 31 korrik, ka 2 gusht, ka një datë ku ndahen dy epoka. Dhe pastaj nuk ka më rikthim në tryeza nga ata që përmbysin tryeza, dhe kërkim të të drejtave që i takojnë një pakice pasi ke dhënë shembullin më të poshtër dhe kriminal sesi për interesa të pushtetit tënd je i gatshëm të përmbysësh të ardhmen europiane të vendit tënd.