Një takim i rëndësishëm që ka zgjatur plot 45 minuta është zhvilluar sot në Presidencë mes kryetarit të Partisë Demokratike Lulzim Basha dhe kreut të shtetit Ilir Meta.
Kryedemokrati u ftua nga vetë Presidenti, një ditë pasi në Komisionin e Ligjeve u miratua në mënyrë unanime, nisma e opozitës parlamentare për ndryshimet në Kushtetutë.
Burime për mediat bëjne me dije se Meta e ka cilësuar kriminale tentativën e mazhorancës për të ndryshuar Kushtetutën në mënyrë të njëanshme. Më tej, kreu i shtetit i ka kërkuar liderit demokrat Lulzim Basha, që opozita të ruajë qetësinë ndërsa ka shtuar se shqiptarët duhet t’i bashkojë Kushtetuta dhe rruga evropiane e Shqipërisë.
“Keni rol të rëndësishëm me qetësi dhe përgjegjshmërinë tuaj për të bashkëpunuar edhe me partneret europianë dhe botën demokratike se e kam theksuar se gjatë tensioneve artificiale në vendin tonë konfliktet në Shqipëri nuk janë të rastësishme”, mësohet të ketë thënë Meta në takimin 45 minutësh me Bashën.