A do ti shtyjë Rama zgjedhjet me pretekst pandeminë? Ja përgjigja e Lulzim Bashës

Kryetari i Partisë Demokratike Lulzim Basha ka vijuar të komentojë situatën politike në shqipëri.

I ftuar në programin “Zonë e Lirë” ai ka deklaruar prerë se zgjedhjet e vitit të ardhshëm nuk do të shtyhen.

Kjo përgjigje erdhi pas pyetjes që i bëri drejtuesi Arjan Çani, nëse Rama mund ta marrë vendimin të shtyjë zgjedhjen duke gjetur si pretekst pandeminë e COVID19.

Po ashtu, i pyetur se sa shanse ka që Rama sëbashku me opozitën parlamentare të bëjnë një puç kushtetues për të mos lejuar koalicionet parazgjedhore, Basha tha se i njeh Kushtetutë, duke lënë të nënkuptohet se nuk mund të ndodhë një gjë e tillë.

Ka rrezik të shtyhen zgjedhjet që janë vendosur në 15 prill- 15 maj 2021?

Basha: Korona është një problem shumë i madh. Nuk ka asnjë shans se u mbajtën në Francë, do mbahen në Maqedonine e Veriut dhe do mbahen, edhe në Shqipëri.

Koalicionet parazgjedhore. Sa mundësi ka që Rama me opozitën parlamentare të bëjnë një puç kushtetues dhe t’i pengojnë ato?

Basha: Koalicionet parazgjedhore janë në Kushtetutë për një arsye të thjeshtë sepse parashikohet si e drejtë themelore e drejta e asocimit, e bashkimit, njerëzit bashkohen për shkak të objektivave të ngjashme, etj. Këtu diskutimi për sistemin është mbyllur më 5 qershor, unë personalisht besoj se Shqipëria ka nevojë për një reformë të thellë Kushtetuese që do forcojë llogaridhënien para qytetarëve.

Kjo do jetë një nga temat që do t’i shtojmë shqiptarëve për diskutim pas zgjedhjeve të ardhshme. Do forcojmë institucionet e kontrollit, kam propozuar një parlament me dy dhoma dhe një sistem mazhoritar të hapur. Këtu problemi nuk është sistemi, sistemi bie në pre e demokracisë shqiptare.

Kjo është të ndryshosh temën e diskutimit, mos të flasin për presionin që i bëhet votuesve, është thjesht një trup propagandistik, Rama do bëjë gjithçka për pushtetin e tij.