Kreu i Këshillit të Lartë të Prokurorisë (KLP) Gent Ibrahimi ka bërë së fundmi një deklaratë të fortë.
Ai është shprehur se ka patur raste kur organet e Vettingut kanë goditur persona që nuk kanë patur asgjë të përbashkët me korrupsionin dhe abuzimin.
Ibrahimi nuk ka ngurruar të përmendë dhe një emër të këtij rasti, e cila sipas tij është Antoneta Sevdari.
“Ajo që më vjen keq për organet e vetingut është se në disa raste kanë goditur persona që kurrsesi nuk kanë gjë të përbashkët me korrupsionin dhe abuzimin. Ka shkarkuar simbole të integritet në radhët e magjistratëve. Antoneta Sevdari është një nga ato”, u shpreh ai mbrëmë në një intervistë televizive.
Ibrahimi u shpreh se është katastrofike që sot vendi është pa Gjykatë Kushtetuese dhe Gjykatë të Lartë.
Ai thotë po ashtu se në ngritjen e institucioneve të reja të drejtësisë kanë ardhur për shkak të procesit të vetingut. Sipas tij, shumëçka ka ndodhur por ka ndodhur më pak sesa pritej dhe kjo për arsyen kryesore se nuk ishin marrë parasysh vështirësitë që do të haseshin në procesin e vetingut. Ibrahimi thotë se, procesi mund të përshpejtohet pasi deri tani nuk ka pasur ritmin që të gjithë kanë pritur.
“Është e vërtetë që nuk ka pasur ritmet e pritura nga të gjithë. Konsolidimi i institucioneve të vetingut është mënyra për të përshpejtuar. Në këto vite kanë fituar ekspertizën e duhur. Shtimi i kapacitet njerëzore në veting është një mënyrë që duhet eksploruar”, tha kreu i KLP-së për “EuroNews Albania”.