LIGJET E BIZNESIT
Ditën e sotme kryeministri Edi Rama ka zhvilluar një konferencë urgjente në të cilën ishin të pranishëm ministrja e Ekonomisë Anila Denaj dhe ai i Rindërtimit Arben Ahmetaj.
Të tre kanë bërë me dije se Shqipëria e ka marrë sasinë e parave prej 650 milionë euro nga Eurobondi në tregjet ndërkombëtare.
Sipas kryeministrit pas kësaj arritje domethënëse, qeveria është gati të vërë në lëvizje Planin Kombëtar “Shqipëria 2030” për Rimëkëmbjen dhe Zhvillimin e ri Ekonomik e Social të Shqipërisë.
Ai shtoi se marrja e këtij borxhi e çon përpara këtë projekt që ai e cilësoi si “Plani Marshall”.
“Falë shifrave reale të financave e të ekonomisë sonë, reflektuar në Librin e Llogarive të Shtetit dhe një vlerësimi real të ecurisë së reformave e të të dhënave makroekonomike të vendit, Tregjet e Kapitaleve reaguan me pozitivitet mbresëlënës në financimin e Shqipërisë”, tha Rama teksa foli për një plan kombëtar “Shqipëria 2030” për Rimëkëmbjen dhe Zhvillimin e Ri Ekonomik e Social të vendit.
Këto fjalë të kreut të qeverisë tregojnë se mesa duket ai ka plane afatgjata për të qëndruar në politikë dhe në postin që mban prej 7 vitesh tashmë.
Ai dëshiron që të jetë kryeministër, pse jo edhe për disa vite të tjera.
“Ne kemi marrë dje një lajm shumë të mirë nga tregjet e kapitaleve dhe fakti është që kemi arritur një rezultat që na inkurajon jashtëzakonisht shumë dhe garanton planin e ri kombëtar Shqipëria 2030 për një transformim të mëtejshëm ekonomik dhe social duke adresuar, rindërtimin, rimëkëmbjen sepse Shqipëria del nga dy goditje, ndryshe nga vendet e tjera, dhe ambicien tonë për një shtysë përpara të ekonomisë dhe punësimit në vitet e ardhshme.
Sapo ne të jemi gati me planin e ri kombëtar, do kemi një event të vecantë të prezantimit të tij, sic e ka bërë me dije dhe ministri që nuk do jetë një plan zhvillimi në letër, aq më pak një strategji por do jetë një plan veprimi i kalendarizuar”, deklaroi kryeministri gjatë fjalës së tij.
