LIGJET E BIZNESIT
Në lidhje me pandeminë e COVID19 dhe situatën e krijuar në vend me shtimin e rasteve të reja ka folur edhe koordinatori i Task-Force, mjeku Arben Gjata i cili është njëkohësisht dhe rektor i Universitetit të Mjekësisë.
I pyetur nëse kjo që po kalojmë aktualisht është vala e dytë e epidemisë së koronavirusit, ai është përgjigjur që jo.
“Kjo është një pas valë njësoj si pas goditjet e tërmetit edhe kjo pandemi ka pas valën e saj”, tha mjeku i cili beson se vera do të jetë më e qetë përsa i përket përhapjes së virusit.
Përsa i përket masave të marra deri tani për të parandaluar virusin, Gjata tha se disa prej tyre janë shumë të rëndësishme dhe se duhen zbatuar patjetër.
“Të gjitha masat që kanë të bëjnë me mos grumbullimin e njerëzve, ruajtjen e distancës në ambientet publike ose në ambientet private, masat të cilat shmangin në maksimum ose ulin riskun e përhapjes së koronavirusit, janë të gjitha masa që qëndrojnë në fuqi. Kjo nuk është që po ndodh në Shqipëri, por në të gjitha vendet evropiane. Janë masa strikte që kanë të bëjnë me parandalimin e sëmundjes më tej”, tha ai për programin “Wake Up”.
Doktor Gjata theksoi se kjo luftë nuk mposhtet nëse nuk ka një bashkëpunim me qytetarët.
“Shqiptarët duhet ta kuptojnë se virusi është mes nesh, që numri i rasteve është rritur, që vazhdon të rritet numri i të shtruarve në spital dhe të gjithë jemi para një rreziku. Kjo mund të jetë një histori e gjatë me këtë virus. Ne duhet të mësohemi me një normalitet të ri që është pikërisht distancomi fizik dhe mbajtja e maskave në ambiente të mbyllura të paktën. Për mua maska është mjeti më i duhur dhe i rëndësishëm. Gjithashtu shmangia e dasmave, funeraleve dhe aktiviteteve të ndryshme që rrezikojnë përhapjen e koronavirusit”, shtoi ai ndër të tjera.
