Teatri u shemb/ Budina nuk i ndal mesazhet e forta: Mafiozët shohin televizor e ngrenë dolli me qeverinë

Tre ditë pas shembjes, vijojnë ende diskutimet për rastin e Teatrit Kombëtar.

Një nga figurat që e mbrojti më shumë godinën, është dhe regjisori i njohur Edmond Budina.

Ai është shprehur se shembja ka nisur në një kohë që 12 veta ndodheshin ende brenda godinës.

I ftuar në  programin “Abc e mëngjesit”, Budina deklaroi se ndërhyrja është bërë me forca speciale, a thua se aty ndodheshin kriminelët më të mëdhenj të globit, ndërkohë që sipas tij, këta të fundit ngre dolli me qeverinë.

“Shembja e Teatrit ka filluar ndërkohë që aty ishin brenda shokët tanë, ishin ende 12 veta brenda. Ndërhyrja është bërë nga forca speciale, a thua se aty kishte kriminelët më të mëdhenj të globit. Ndërkohë që kriminelët rrinë në shtëpi, shohin televizorin e ngrenë dolli me qeverinë, për të thënë se ja arritëm. Ne jemi të fuqishëm i shkelim me këmbë”-tha Budina.

“Shqiptarët duhet të kenë energji dhe shpresë për t’u ngritur”, shtoi ai duke bërë një apel të fortë për të gjithë qytetarët.

Budina i dha edhe një “shuplakë” të fortë Ramës, ku theksoi se “Më thuaj një vend të botës ku një kryeminister mban një televizor privat. As në vendet e Afrikës nuk ndodh”.