LIGJET E BIZNESIT
Ditën e sotme zv.kryeministri Erion Braçe ka reaguar mjaft entuziast në lidhje me prodhimin e shalqinit të Divjakës së Lushnjes ku është shprehur se është gati për eksport.
Ndër të tjera numri dy i qeverisë ka denoncuar hyrjen e këtij produkti nga një vend fqinj që sipas tij nuk është ai i llojit vendas.
Ai ka thumbuar edhe të pasurit duke thënë se nuk i hyn në sy sakrifica e atyre që i kanë prodhuar këto ushqime, dhe shesin prodhimet e huaja me çmime marramendëse.
“Ky është shalqini ynë i parë. Kush mbolli e kultivoi shalqi në serra, tani po vjel. Të premten, kërkova e mora në treg shalqi. Nuk ishte i yni, as i hershmi, ishte i importit, ardhur nga një vend fqinj me ne, këtu afër. Ishte i kuq dhe i papjekur, pa shije as sheqeri, i fortë e me fara të bardha. Po ua them troç. As i afrohej shalqirit të prodhuar nga bujqit në Divjakë, Lushnjë. Shalqini ynë është ky. Ai më i sulmuari, më i shari e më i çuari dëm nga vetë media apo palaço vendas”, shprehet ai.
Braçe theksoi se “besoj, java tjetër na nxjerr në eksport për të vijuar fort me të”.
“Ndërkohë, ka nga këta të pasurit e Tiranës, bashkë me gastorë që kurrë nuk e bënë një vepër që, habiten pse unë shkoj në një treg, pse unë merrem me qepë e patate, pse unë merrem me çmimet e tyre. Natyrisht, kush nuk i numëron paratë por i peshon, kush i paditur për pasojë as kupton, as që i hyn në sy puna e bujkut, mundimi e sakrifica e tij për të prodhuar që të hanë këta, madje me çmime qesharake, të shesin këta nga resortet e tyre me çmime marramendëse”, tha Braçe.
“Natyrisht, unë do vijoj të merrem me bujqit, punën e tyre, produktet e çmimet e tyre; Është jeta e tyre dhe ekonomia jonë. A po, sa merreni me mua, bëni pazar e hani shalqi vendi”, u shpreh ai.
